Napuhag ang mga nagakaon sa Ribshack Lacson bangud sa madamol nga aso kagab-i, Oktubre 28.
Sa interview sang Bombo Radyo Bacolod kay Emmanuel, isa sa mga nagaubra sa nasambit nga kalan-an, may yara sang naglupok kag didto nag-umpisa ang pagpuog sang aso.
Suno diri, bangud sa madamol nga aso ang mga nagakaon ang naghingagaw gwa samtang ginabitbit ang mga pinggan.
Ginpahayag man sini nga nagtawag man sila gilayon sa Bacolod City Fire Station nga gilayon man nga nagresponder.
Ginalantaw sini nga sa inasalan naghalin ang aso.
Wala man sang nasamaran sa nasambit nga sunog.
Samtang sa chimney ang ginpahayag ginhalinan sang kalayo.
Sa interview kay Fire Superintendent Jenny Mae Masip, Fire Marshal sang Bacolod City Fire Station, napuog sang aso ang establisyemento gani ginpagwa ang tanan nga mga customers kag staff, kasubong man ang mga tenants tubtob sa ikaapat nga panalgan sang building.
Suno diri, padayon pa ang imbestigasyon kun ano ang gintunaan sang kalayo.
Ginpahayag nga apektado ang 58sqm sang establisyemento.
Nagdangat lamang sa first alarm ang sunog, kag gindeklara nga fire out las-8:24 sang gab-i.
