Nagdangat na masobra sa P41 million ang ginbilin nga halit sa mga humayan kag talamnan sang mais sa Negros Occidental bangud dry conditions humalin sang Agosto tubtob Setyembre, santo sa datos nga ginpagwa sang Office of the Provincial Agriculturist (OPA).
Sa report nga ginpasa ni OPA officer-in-charge Dina Genzola sa opisina ni Negros Occidental Governor Eugenio Jose Lacson kag Provincial Administrator Atty. Rayfrando Diaz II sang Oktubre 23, 2026, naglab-ot na sa 1,511.46 hectares sang agricultural land kag 2,403 ka mga mangunguma gikan sa nagkalainlain nga mga banwa kag ciudad sa probinsya ang apektado.
Ang mga nahalitan nga LGUs ang ginalakipan sang San Carlos City, Toboso, Don Salvador Benedicto, Escalante, Calatrava, Cadiz kag Sagay City, Moises Padilla, Hinigaran, La Castellana, Isabela, Cauayan, Ilog kag Kabankalan City.
Ang pinakadako nga nahalitan amo ang humay nga nagdangat sa1,419.53 hectares kag nagabalor sang P38,260,752.93.
Ang banwa sang Hinigaran ang naka-report sang may pinakamadako nga halit sa humayan nga nagdangat sa P16.67 million nga may 976 ka mangunguma ang apektado, samtang ang Toboso naman ang may pinakamadako nga nahalitan nga talamnan sang mais nga nagdangat sa 91,934 kunsa diin 152 ka mga mangunguma ang apektado.
