Tatlo ang ginbawian sang kabuhi matapos matiphag ang isa ka bahin sang dako nga volcanic rock formation sa isa ka bantog nga tourist destination sa Turkey kahapon, Oktubre 29.
Ang nasambit nga bahin sang rock formation, nga kilala bilang fairy chimney, ang nagtibusok malapit sa isa ka parking lot sa Goreme region sang Cappadocia, Turkey nga ginkapatay sang tatlo ka indibidwal samtang lima naman ang pilason.
Suno kay Governor Huseyin Kok, mahimo nga tuga sang grabe nga pag-ulan ang pagkatiphag sang rock formation.
Suno diri, padayon ang mga rescue team sa pagpangita sa iban pa nga indibidwal nga posible na-trap sa idalom sang mga bato.
Dugang pa ni Kok, duha sa mga napatay ang ginkilala nga Turkish nationals apang wala na naghatag pa sang dugang nga detalye natuhoy sa ikatatlo nga biktima.
Suno naman sa Justice Minister sang Turkey nga si Akin Gurlek, nagapadayon na ang imbestigasyon nahanungod sa insidente.
Ang nasambit nga tourist spot sang Cappadocia sa Central Turkey ang kalakip sa mga ginakabig UNESCO World Heritage site kag isa sa mga regular nga ginakadtuan sang mga turista sa pungsod.
