Ginalauman nga linibo ang magabisita sa ila mga pinalangga nga minatay sa Granada Public Cemetery sa UNDAS 2026.
Sa interview sang Bombo Radyo kay Punong Barangay Armando Vito sang Brgy Granada, Bacolod City, nakasugilanon na sila kay Mayor Greg Gasataya, City Administrator Atty Mark Steven Mayo, Bacolod City Police Office, Bureau of Fire Protection kag iban pa nga ahensya angot sa preparasyon para sa Tigkalalag.
Suno kay Vito, isa sa ila gintalakay amo ang traffic plan lakip na kun diin nga dalan ang pagasirad-an.
Ginaplastar na nila kun diin ang mahimo parkingan sa mga salakyan.
May bakante man nga lote kun sa diin malapad ang duta nga mahimo didto e-park ang mga salakyan.
Suno sa Punong Brgy, wala sang problema sa mga magabaligya bangud yara man lang ini sila sa mga footwalk nakaplastar.
May yara man sang canopy patyo para sa mga otoridad nga maga-stanby inkaso may emerhensya.
Dugang pa, may yara man sang mga Brgy Tanod nga naka-assign kag nagbutang man si Mayor Greg sang mga traffic enforcers sa area.
Bangud wala na ginpalubngan ang Burgos Public Cemetery, ginalantaw ni Vito nga mas magadamo pa gid ang magabisita sa subong sa Granada Public Cemetery.
Ginpanugyan sini nga kun mahimo temprano palang magpadulong sa sementeryo bangud ginalauman nga magaginutok na sa Oktubre 31, Nombyembre 1 kag 2.
Sa pihak sini, ginpasiguro ni Vito nga nakahanda na ang tanan para sa Undas 2026., Sa pihak nga bahin, nagpanawagan ang isa ka lapida maker sa Bacolod City Government nga hatagan sang atensyon ang mga pampubliko nga sementeryo ilabi na sa Burgos Public Cemetery nga tuman na kasiot kag na-perwisyo sang dalagko nga kahoy.
Sa interview sang Bombo Radyo Bacolod kay JC Conti, isa ka manug-ubra sang lapida, nagahingyo ini sa ciudad nga hatagan sang tikang ang mga dalagko nga kahoy kasubong man ang maintenance sa patyo para man sa seguridad sang mga bisita.
Suno diri, bangud sa tuman kadako sang mga kahoy, amat-amat nga nagakaguba ang mga panchon gani mas maayo suni diri nga pang-utdan ini.
Dugang pa sini, ginatiniran man sang mga man-og ang nasambit nga patyo bangud sa kasiot sang lugar. Sa pihak nga bahin, kadungan sa pagdamo sang mga nagabisita sa ila minatay sa Burgos Public Cemetery, nagadamo naman ang nagabayad sa sepulturero sa pagpanglimpyo kag pagpinta sa pantyon sang ila mga nagtaliwan na nga himata.
Sa interview sang Bombo Radyo Bacolod kay JM, siya ang indi regular sa Burgos Public Cemetery, sa baylo siya ang nag-umpisa lamang sa pagplastar sang Oktubre 25.
Nagapalimpalad lamang ini nga may magkuha sang iya serbisyo, kag sa amat-amat nga pagdamo sang mga bisita, ginakalipay niya nga wala gid ini nagaka-zero sa kada adlaw.
Ang iya sukot ang nakadepende sa kalaparon sang patinluan ukon papintahan nga pantyon, nga nagarange sang P250 tubtob P300.
Siya ang naga-lettering man sa kaangay nga presyo.
Suno kay JM, mahimo nga magatinir pa ini sa sementeryo tubtob sa Nobyembre 2.
