Natigayon nga madakpan sang mga kapulisan ang isa ka lalaki nga hungod nga ginsunog ang balay sa Purok Katilingban, Barangay 40, Bacolod City Domingo sang hapon, November 1.
Ginkilala ang nadakpan kay alyas Alexander, kag residente sang nasambit nga lugar.
Sa interview sang Bombo Radyo Bacolod kay Police Captain Glen Montaño, Station Commander sang Bacolod Police Station 6, may nagpahibalo sa Police Station nga may yara sang nagluntad nga sunog sa nasambit nga lugar.
Suno kay Montaño, ginrespondehan nila ini kag sa pagbinuligay sang mga pumuluyo natigayon nga mapalong ang kalayo.
Ginpahayag sang station commander nga gilayon man nila nga gindala sa Police Station ang nadakpan nga persona nga naghungod sunog sa iya puluy-an.
Dugang pa antes pa man nagluntad ang insidente, ginapaandaman na ni Alexander ang iya iloy nga sunugon sini ang ila balay.
Suno kay Montaño, bangud nga nalulong sa bisyo sa illegal nga druga kag naapektuhan na ang utok sang nadakpan nagakakurdam na ang iloy sini gani nagakadto sa Police Station agud nga magpangayo sang bulig.
Wala man nagbato ang si Alexander sang ini ang gindakop sang mga kapulisan bangud nakahibalo kag nag-ako man ini sang iya sala.
Ginpahayag ni Montaño nga kun klaro man ang paminsaron ni Alexander bangud gin-estorya man niya ini kag nagasabat man sang insakto.
Nagresponde man ang katapo sang Bacolod City Fire Station apang napalong na ang kalayo.
Sa karun, nagapakig-angot ang Bacolod Police Station 6 sa Bacolod City Fire Station kun mahimo sila makapasaka sang kaso batok sa nadakpan nga persona nga hungod nga nagsunog sang ila puluy-an.
