Patay ang 32-anyos nga construction worker samtang pilason naman isa pa ka lalaki matapos ginbuno sa baylehan sa Purok 2, Barangay Mambugsay, Cauayan, alas-12:20 kaina sang kaangahon kadungan sang All Souls’ Day.
Ginkilala ang napatay nga si alyas “Dodo”, single samtang ang pilason naman amo si alyas “Mel”, 45-anyos, lalaki, kag kasado.
Ang suspect ang ginkilala nga si alyas “Maro”, legal ang edad, lalaki, single, lunsay mga residente sang nasambit nga lugar.
Sa inisyal nga impormasyon, samtang nagabayle ang duha ka mga biktima sa covered court sang Barangay, nagpalapit ang suspect.
Ginpatong ni Maro ang iya abaga ni Dodo kag hinali na lamang ini nga ginbuno.
Sang ini ang natumba, ginbuno pa gid liwat sang suspect ang biktima.
Gintinguhaan ni Mel nga punggan ang suspect kag kuhaon ang patalom apang ginbuno man siya sini sa nawala nga bahin sang iya tuhod.
Gilayon nga nagpalagyo si Maro matapos ang krimen.
Dead on Arrival si Dodo samtang padayon pa nga ginabulong sa ospital si Mel.
Nagpatigayon sang hot pursuit operation ang kapulisan agud matumod kag maaresto ang suspect.
