Ginapakamaayo ni Bacolod City Administrator Atty Mark Steven Mayo nga wala sang na-record nga mga dalagko nga insidente kadungan sang UNDAS 2026.
Suno diri, Oktubre 29 tubtob Nobyembre 2 ang gintalana nga UNDAS period ni Bacolod City Mayor Greg Gasataya.
Dako ang pagpasalamat sini nga humalin sa umpisa wala sang mga na-record nga dalagko nga insidente, kaangay sang tinalikdan nga tuig nga madamo sang nagreklamo bangod sa indi makita nga nitso sang iban nga minatay, ukon reklamo sa mahigko nga patyo.
Suno diri, sulit-sulit nga ginpahanumdom ni Mayor Greg sa mga departamento nga incharge sa pagpaninlo sang sementeryo nga dapat maseguro nga preparado na ang mga ini antes ang tigkalalag.
Kalakip diri ang General Services Office, Public Order and Safety Office, City Legal Office, kag Bacolod Environment and Natural Resources Office.
Samtang nagbantay man ang mga kapulisan sa koordinasyon sa mga traffic enforcers, barangay tanod kag mga force multipliers, samtang may mga nakastandby man nga medical group sa kada sementeryo.
Klaro man ang mandato ni Mayor Greg sa ‘No Permit No Vending’ ordinance.
Masobra 200 ang vendors nga nahatagan sang special permit, samtang ang City Enforcement Team naman ang nagpangita sa mga reported nga vendors nga nagabaligya nga wala sang permit.
Panindugan ni Mayo nga luyag ni Mayor Greg nga mahatagan sang kahilwayan ang pinsar sang mga magabaligya sang bulak, kandila kag mga kakanin, nga lehitimo ang ila negosyo, gani unfair kun pahanugutan lamang ang wala sang permit.
