Nagdangat na sa apat ang patay sa nagluntad nga pagpangilat sa Hacienda Manolo, Barangay DSB, Pontevedra, Negros Occidental sang Sabado, Oktubre 31.
Sa interview sang Bombo Radyo Bacolod kay Police Captain Darryl Kuhutan, Acting Chief of Police sang Pontevedra Municipal Police Station, nadugangan ang napatay matapos nga ang ginreport nga comatose sa ospital ang ginbawian sang kabuhi sang Lunes sang aga.
Ang napatay amo si Moises Sibugan, Legal ang edad kag residente sang Barangay General Malvar, Pontevedra, Negros Occidental.
Ang duha pa ka mga nasamaran ang yara na sa estable nga kondisyon.
Una na nga gin-report nga tatlo ang napatay kag ini ang ginlakipan nanday Dennis Moscoso, 44 anyos, single, kag residente sang Barangay Batuan, San Enrique; Marcelino Sibugan, 35 anyos kag residente sang Barangay General Malvar, Pontevedra kag Felimon Genova, 60 anyos, kasado kag residente sang Barangay 2, Pontevedra.
Suno sa hepe, si Marcelino kag Moises ang magparyentihanay.
Nagpanugyan si Kuhutan sa mga pumuluyo nga sa tion nga magpangilat likawan ang open field kasubong man ang mga devices nga madasig dakpon sang kuryente agud malikawan nga maigo sini.
