Wala na sang kabuhi ang isa ka college student sang nasapwan Martes, Nobyembre 3, 2026 sa idalom sang pil-as sa Sitio Tagungtungan, Barangay Mambulod, La Libertad, Negros Oriental.
Una na nga gin-report ang estudyante nga missing sang Domingo, Novembre 1, 2026.
Ginkilala ang biktima kay Peniel Cadeliña Barayog, residente sang Barangay Ogod, Bayawan City, kag Geology student sa public university sa Dumaguete City.
Nakita ang bangkay sang biktima kalakip ang isa ka motorsiklo.
Sa interview sang Bombo Radyo Bacolod kay Police Major Marve Bolay-og, Chief of Police sang La Libertad Municipal Police Station, nasapwan si Barayog sang mga residente sang Sitio Tagungtungan, Barangay Mambulod.
Suno kay Bolay-og nga indi pa sang mga ini maestablisyar kun sang san-o pa ini nahulog sa pil-as sa nasambit nga lugar.
Ginpahayag sang hepe nga sa inisyal nga assessment nahulog ini sa pil-as samtang nagamaneho sang iya nga big bike.
Ang biktima ang may yara sang suksok nga helmet apang bangud sa impact sang pagkahulog sini sa pil-as nga may kadalumon nga 50 meters nakaangkon ini sang samad sa ulo nga posible gintunaan sang kamatayon sini.
Sa karun padayon pa ang imbestigasyon sang mga kapulisan agud nga matumod kun paano ini nga nakalab-ot sa La Libertad bangud ini ang residente sang Bayawan City.
Sa karun, ginahulat sang mga kapulisan ang resulta sang post mortem examination sa bangkay sang biktima.
Sa impormasyon nga nakuha sang Bombo News Team, antes pa man ini nasapwan nga wala na sang kabuhi, nagasabat man ini kun tawgan apang wala sini ginapahibalo kun sa diin ini.
May post man ini sa social media nga nagapahayag nga luyag na sini utason ang kabuhi bangud nabudlayan na ini kag indi na niya masarangan ang ginapangatubang sini.
