Posible nga magdangat sa duha ka tuig ukon masobra pa ang trial sang International Criminal Court (ICC) kay former President Rodrigo Duterte.
Ang trial ang natalana nga maga-umpisa sa Nobyembre 30, masobra 20 ka bulan humalin sang gin-aresto sa Pilipinas ang anay presidente.
Suno kay ICC-accredited lawyer, Atty. Gilbert Andres, mahimo nga mapanubo ukon mas mapalawig ang trial depende sa kadasigun sang pagpresenta sang mga testigo kag sa mga ginhanda nga ebidensya sang magkatuhay nga kampo.
Si Atty. Andres ang isa sa mga common legal representative sang mga biktima sang drug war sang nakaligad nga administrasyon, kag suno diri, importante ang nangin desisyon sang international tribunal nga i-obligar si Duterte nga mag-atubang mismo sa trial.
Suno diri, isa lamang ang sahi sang international crime nga ginapangatubang sang anay presidente sang Pilipinas gani mas simple ang kaso ikumpara sa iban pa nga mga kaso sa international tribunal.
Ginalauman naman nga kadungan sang trial ang pagbasa sang confirmed charges kag pangayuan sang plea si Duterte.
