Ginselebrar sang alkalde sa Bago City ang pagbangon sang ciudad gikan sa halit sang Bagyong Tino kadungan sa pagkomemorar sang 128th Al Cinco de Noviembre ukon Negros Day.
Ginsuguran ang aktibidad kaina sang aga sa flag raising ceremony, wreath laying sa monumento ni General Juan Araneta sa atubang sang Bago City Coliseum.
Kasunod sini, nagpatigayon sang civic parade nga ginsundan sang “Sigabong sang mga kanyon”.
Ini ang kabahin sa pagdumdom sa pagkabaganihan, kaisog kag kaalam sang mga Negrense nga naggamit sang ginrolyo nga amacan kag gindesinyo nga kaangay sa kanyon, kag mga paklang sang lubi nga ginpintahan agud mangin kalaragway sang armas.
Pinaagi sini nagpati ang mga katsila nga mabaskog ang pwersa sang mga Negrense, kag sila ang nag-atras nga nagresulta sa bloodless revolution.
Apang madumduman nga wala gid naselebrar ang Al Cinco de Noviembre tinalikdan nga tuig bangod naglaslas man ang Bagyo Tino.
Sa mensahe ni Bago City Mayor Marina “Mayette” Javellana-Yao, nakita ang pagbangod sang ciudad sa sulod sang isa ka tuig gikan sa trahedya.
Sa baylo, madamo pa sang mga bugay nga nag-abot sa ciudad, kag dako ang iya pagpasalamat nga ang pag-umwad ang natabo sa idalom sang iya pagpamuno.
Naglunsyar man sila sang libro nga nagapakilala sang maragtas sang Bago City partikular na ang pagkabaganihan ni General Juan Araneta.
Ginpasalamatan man sang alkalde sa ciudad sang Silay ang tanan nga nag-upod sa ila pagkomemorar sa 128th Al Cinco de Noviembre ukon Negros Day partikular na ang mga kabataan.
Nahibaluan nga ang nagpanguna sa bloodless revolution sang 1898 amo si General Aniceto Lacson sang Silay City kag si General Juan Araneta sang Bago City.
Nadaog nila ang gyera batok sa mga espanyol paagi sa paggamit sang amakan nga ginrolyo agud mangin kaangay sang kanyon, kag mga paklang nga ginpintahan kaangay sang armas, gani nag-atras ang Spanish forces.
Ang programa ang nag-umpisa alas-7:00 sang aga, apang wala natigayon ang pagmartsa bangod sa pagbubo sang madamol nga ulan.
Sa ambush interview sa alkalde, gin-emphasize niya nga ang pag-isa sang mga Silaynon sa karun nga panahon ang nagresulta sa malinong, matawhay, kag ma-uswagon nga ciudad.
Dako ang iya pagpasalamat sa mga nagtambong sa pagdumdom, partikular na ang youth nga amo ang future leaders.
Importante suno kay Gallego nga matun-an sang kabataan ang pagkabaganihan sang mga Silaynon sadto, bangod sila naman ang mangin paglaom sang pungsod kag sang Silay City.
