Kritikal ang isa ka cook matapos ginbuno sa circumferential road sa bahin sang Brgy Taculing, Bacolod City, kasunod sang komosyon sa ilimnan pasado alas-3:00 kaina sang kaagahon.
Sa interview sang Bombo Radyo Bacolod kay Police Captain Glen Montaño, station commander sang Bacolod Police Station 6, magkaupod nga nag-inom ang biktima nga ginkilala lamang bilang Alyas Edmar kag ang katrabaho sini nga dishwasher sang isa ka kalan-an, sa nasambit nga ilimnan sang magluntad ang komosyon.
Ang komosyon ang nagluntad sa gwa na sang ilimnan, sa bahin sang parking area.
Sa nabatun nila nga impormasyon, grupo sang pamatan-on ang nakasumpong sang cook, apang ang impormasyon ang ila pa nga iverify.
Ginkumpirmar man sang station commander nga may natabo nga komosyon bangod sa nakita nga nagalinapta nga buka nga botelya sa parking area, apang suno sa dishwasher, kutsilyo ang gingamit sang suspect sa pagbuno.
Nahimo pa sang cook nga makapalagyo sang pila ka metros tubtob nga natumba sa dalan.
Ini ang naabtan sang nagresponder nga kapulisan, nga gilayon man nga ginkarga sa ila patrol agud madala sa ospital.
Sa impormasyon sang Bombo News Team gikan sa area, may pilas ang biktima sa idalom sang liog kag may iban pa nga minor wounds sa lawas.
Sa karun, wala pa matumod ang matuod nga identity sang cook, nga yara sa kapin 30 tubtob 40 ang edad, apang suno sa dishwasher ini ang residente sang Silay City.
Ginpadulungan pa sang kapulisan ang ginatrabahuan nila nga kalan-an agud matumod ang identity kag mapahibalo sa pamilya.
Ginatumod man ang rasun sa komosyon kag kun sin-o ang mga suspect, samtang tsekyaron pa kun may CCTV sa area.
Ang suspect ang mahimo mangatubang sang kaso nga homicide.
