Napaslawan nga makuha ni Alex Eala ang ikaduha na kuntani nga WTA title matapos malutos kay American player Claire Liu, sa score nga 3-6, 0-6, sa final sang Hong Kong Open.
Sa pihak sang pagka-pierde, nagpabilin nga positibo si Eala, kag ginpanginbulahan si Liu sa kadalag-an sang labing-una sini nga tour title.
Nangin makahalawat-hawat ang una nga set tubtob nga nagpatas sa 3-3, antes naka-abanse si Liu paagi sa service game.
Antes pa man makalab-ot si Eala sa finals, ini ang nag-agi sa mga mabaskog nga mga kontra kalakip ang semi-final match batok sa anay world number three nga si Maria Sakkari.
Posible nga nakaapekto man sa kondisyon sang pinay tennis star ang sunod-sunod nga mabudlay nga mga match.
Sa ikaduha nga set sang hampang sa finals, naghingyo si Eala sang medical timeout samtang naulihi ini sa score 3-4 kag gindapatan ini sang benda sa iya natuo nga hita.
Nakakuha pa ini sang pito ka tsansa nga maka-abanse sa una nga game sang ikaduha nga set sa diin naglawig sang masobra 26 ka minutos.
Naluwas sini ang apat ka break point, apang sa ulihi, nakuha ni Liu ang abanse matapos nag-igo sa net ang backhand shot ni Eala.
Nagpasalamat naman ang Filipina tennis star sa iya mga fans nga padayon nga nagasuporta sa iya.
