Nagpatigayon ang Office of the Vice President sang libre nga legal assistance program sa Bureau of Jail Management and Penology (BJMP) Metro Bacolod District Jail sa Brgy Handumanan kahapon.
Sa interview sang Bombo Radyo kay Dr. Chris Sorongon, Satellite Manager sang OVP Western Visayas, sang tinalikdan nga duha ka tuig, personal nga nagbisita si Vice President Sara Duterte sa BJMP Handumanan kag nagpromisa nga magahatag sang free legal assistance program sa pagbalik sini.
Ini ang kabahin sa selebrasyon sang ika-91 founding anniversary sang OVP.
Lakip sa mga benepisyo sang nasambit nga programa ang legal consultations para sa mga PDLs kaangay sang assistance sa mga documents, legal rights kag agency refferals sa bulig sang PAO-Bacolod, BJMP Metro Bacolod District Jail, UNO-R College of Law, kag local volunteer lawyers.
Luwas sa mga abogado, ginpahayag ni Sorongon nga may yara man sang mga nurses agud magcheck sa blood pressure kag blood sugar sang mga PDLs.
May gin-imbitar man sila nga mga optical clinic agud magpatigayon sang free eye check-up kag nagpanagtag sang reading glasses.
Suno kay Sorongon, una nga nagbisita ang Bise Presidente sa Sara Central Elementary School sa Iloilo City kahapon sang aga para sa selebrasyon sang Book Month kag nagpanagtag man ini sang school bags kag school supplies sa mga estudyante kag nagpartisipar sa tree-planting activity.
Pagkatapos sini, nagpadulong sa ciudad sang Bacolod si Vice President Sara Duterte para sa iban pa nga aktibidad.
Lauman man nga magalibot ang Bise Presidente sa mga eskwelahan sa Bacolod subong nga adlaw agud magpatigayon sang aktibidad para sa mga estudyante.
Mensahe sang OVP Western Visayas Satellite Manager sa publiko nga ginahimo sang Bise Presidente ang tanan nga kamaayuhan para sa mga Pilipino kag nagpasalig nga padayon ang commitment sang ila opisina sa pagdul-ong sang serbisyo nga malapit sa tawo.
