Ginaduso sang Sangguniang Panlungsod sang Bacolod ang hugot nga pag-monitor sa mga gas station kun nagasunod sa ginpatuman nga fuel price adjustments.
Sa interview sang Bombo Radyo kay Bacolod City Councilor Atty Caesar Distrito, nagpasar na sang resolusyon ang konseho para sa estrikto nga price monitoring kun sa diin ginapanawagan sa Bacolod City Price Monitoring Council, City Legal Office, kag Business Permits and Licensing Division nga magcoordinate sa DOE kag Department of Trade and Industry ang gilayon nga pagmonitor sa mga gasolinahan agud masiguro kun nagasunod sa ginpatuman nga fuel price adjustments.
Suno sa Konsehal, unfair para sa mga magagmay nga negosyante kag mga motorista nga kun may pagsaka sa presyo sang gatong, madasig ang pagpatuman sang mga gas station apang kun may rollback nagasira sila sa rason nga wala sang available nga stock.
Dugang pa, may pila man sila ka mga reklamo nga nabaton kun sa diin ginaforward sa ila nga ang iban nga mga gasolinahan ang wala nagasunod sa ginpatuman nga fuel price adjustments.
Dapat suno kay Distrito, tanan nga gasolinahan magpatuman sang insakto bangud kaluluoy ang mga ordinaryo nga pumuluyo nga nagapas-an sa problema.
Gin-athag man sang konsehal nga wala ginahilabtan sang Sangguniang Panlungsod ang presyo sa mga gasolinahan bangud sa Oil Deregulation Law apang dapat suno sa iya, mag-comply lang gid ang mga ini sa fuel price adjustments.
Paandam naman ni Distrito nga mahimo dagdagan sang penalidad santo sa permit nga gin-issue sa mga gas stations kun wala nagasunod sa ginpatuman nga fuel price adjustments.
