Pagpangawat ang isa sa ginalantaw nga motibo sa pagpatay sa 50-anyos nga negosyante sa Hacienda San Benito, Barangay Crossing Magallon, Moises Padilla sang Martes sang kaagahon, Nobyembre 10.
Madumduman nga ginbawian sang kabuhi si Reynaldo Disoy nga residente sang Brgy San Agustin, Isabela matapos gintiro sang wala pa makilal-an nga suspect samtang nagamaneho sang canter truck.
Sa interview sang Bombo Radyo kay Pmaj. Ryan Villarosa, hepe sang Moises Padilla Municipal Police Station, may nakita sila nga nabilin nga motorsiklo sa area nga amo ang ginasakyan sang suspect.
Suno kay Villarosa, nahulog ang motorsiklo sang suspect sa kalog rason nga wala natigayon ang plano nga pagpangawat sini sa biktima.
Dugang pa, ginalantaw man ang anggulo nga tuyo gid sang suspect nga patyon si Disoy.
Suno kay Villarosa, ginakumpirmar pa nila kun sin-o ang tag-iya sang motorsiklo.
Pahayag sini nga wala pa sila sang makabig nga person of interest samtang nagapadayon pa ang ila nga imbestigasyon angot sa natabo nga insidente.
