Tatlo tubtob apat ka gasolinahan ang natukiban nga wala nagsunod sa mega rollback sa presyo sang gasolina.
Sa interview sang Bombo Radyo Bacolod kay Bacolod City Administrator Atty Mark Steven Mayo, segi-segi ang paglibot sang monitoring team sang City Treasurers’ Office sa pagtsekyar sang presyo, supply, kag calibration sang gas station.
Nahibaluan nga P16.80 ang gintalana nga rollback sa presyo sang gasolina sang Department of Energy sumugod sang Martes.
Magasumiter naman sila sang incident report sa Department of Energy, kag ang ahensya na ang bahala nga magdesisyon kun ano ang mangin tikang batok sa mga nagsupak nga negosyo.
Samtang magahulat na lamang sila kun magpangayo sang bulig ang DOE sa pag-implementar sang ila mahimo nga sanction, kaangay sang show cause order ukon closure order.
Pahayag ni Mayo nga isa sa mga dako nga gas station ang naglapas, kag sa pahayag sang empleyado, nagsala lamang sila sa calculation.
Ini bangod sarang mapatigayon ang price rollback ukon price hike sa staggered basis.
Nagpatuman sang staggered price rollback ang nasambit nga gas station, apang sa kabug-usan, P12 lamang ang ila nga napanaog, ukon kulang sang P4.
Sila ang padayun pa nga magalibot sa mga gasolinahan para sa random monitoring.
