Patay ang isa ka patrolman bangod sa accidental firing sa Negros Oriental State University (NORSU) Compound, Brgy Caranoche, Sta Catalina, Negros Oriental alas-12:30 kaina sang kaagahon.
Ang biktima ang ginkilala nga si Patrolman Leonard James Fajardo, 27 anyos, residente sang Cawitan, Santa Catalina, Negros Oriental.
Sa inisyal nga impormasyon, ang pulis upod sa iya live-in partner nga si Alyas Joy, 26 anyos, ang nagpadulong sa balay sang iya pakaisa nga si Alyas Mark, 27 anyos sa NORSU Compound.
Pag-abot nila, naga-inom sang makahulubog nga ilimnon si Mark upod sa abyan sini nga si Alyas Ken, 25 anyos, residente sang Boyco, Bayawan City, Negros Oriental sa ugsaran sang balay.
Apang si Mark ang naghalin bangod may ginkadtuan sa ciudad sang Bayawan, gani ang nag-updanay sa pag-inom amo sanday Patrolman Fajardo kag Ken, samtang nagtulog naman sa sulod sang balay ang live-in partner sang pulis.
Ginapahayag nga nagpatigayon sang demonstration ang pulis sa paggamit sang iya service firearms, kag didto na sini aksidente nga napitik ang gatilyo kag naigo ang kaugalingon.
Gilayon man nga ginpukaw ni Ken si Joy matapos ang insidente, kag ginhingagaw nila dala sa Bayawan District Hospital, apang gindeklarar nga dead on arrival.
