Natalana na nga pagasuguran na ang pagkuha sang mga volcanic debris sa Ibid Creek sa Barangay Biak-na-Bato sa banwa sang La Castellana, Negros Occidental.
Sa interview kay Provincial Environment Management Office ukon PEMO Head Atty. Julie Ann Bedrio, suguran na ang operasyon sa oras nga matapos ang mga kasugtanan sa mga pribado nga hauler trucks matapos nga nakabaton na sang Environmental Compliance Certificate ukon ECC ang probinsya gikan sa Environmental Management Bureau–Negros Island Region sang Nobyembre 7.
Suno kay Bedrio, ginpatigayon man sang probinsya ang koordinasyon kag briefing para sa mga interesado nga trucker kag buyer sa Negros Residences Function Hall sang Nobyembre 12.
Sa idalom sang mga patakaran, kinahanglan magsumiter ang mga hauler sang letter of intent nga nagapakita sang kadamuon sang materyales nga ila kuhaon kag kun pila ka truck ang ila gamiton.
P100 per cubic meters ang pagabayaran sang buyer sa Negros Occidental Provincial Treasurer’s Office para sa pakuha sang transport permit.
Nagbutang man sang marker ang provincial government agud nga indi maglapaw sa gin-aprubahan ECC.
Nahibaluan nga 67,000 tubtob 67,530 cubic meters sang volcanic lahar deposits gikan creek ang gin-aprubahan sang EMB nga mahimo makuha para sa commercial use.
