Parehas nga nagpartisipar ang mga personnel sa Coast Guard Station Northern Negros Occidental kag Coast Guard Auxiliary District Southern Visayas sa Dugong Bombo 2026 sa City Mall Mandalagan.
Sa interview sang Bombo Radyo Bacolod kay Petty Officer 1 Joan Tundag, Petty Officer in-charge sa Education and Program S12 and S9 sang Coast Guard Station Northern Negros Occidental, 18 ang ginpadala nga personnel para magdonar sang dugo.
Pasalig ni Tundag nga suportado gid sang Philippine Coast Guard ang Dugong Bombo blood letting program sang Bombo Radyo Philippines, in partnership with Bombo Radyo Philippines Foundation Inc. kag Philippine Red Cross.
Panindugan sang mga ini nga ang pagdonar sang dugo ang katumbas sa pagsalbar sang kabuhi, nga amo man ang mandato sang Philippine Coast Guard.
Samtang indi man madula sa Dugong Bombo kada tuig ang presensya sang Coast Guard Auxiliary District Southern Visayas.
Ang mga ini ang ginpangunahan mismo ni District Auxiliary Director Rear Admiral Dannyl Yap.
Dugang pa ni Yap nga gin-agda man nila bisan ang mga grupo sang tricycle drivers, kag trisikad driver.
Ini sa panindugan nga tuman ka importante sang Dugong Bombo, bangod tanan ang mahimo nanginahanglan sang dugo.
Pahanumdom niya nga indi lang ang mga may ara na ngadaan sang balatian ang nagakinahanglan sang blood infusion, bangod may mga emerhensya kun kis-a nga kinahanglan matughungan sang dugo kaangay sang bag-ong bata kag naaksidente.
Sa ila pagpartisipar, indi lamang tawo ang ila nga dala bangod nagdonar man sila sang hot meals kag tinapay.
Sa malawig nga tuig na nga pag-upod sang Coast Guard Auxiliary District Southern Visayas sa Dugong Bombo, ini ang matawag ni Yap nga champion nga programa.
Panawagan ni Yap nga palanggaon ang isigkapareho paagi sa paghatag sang hamili nga dugo.
