Indi madula sa kada tuig nga Dugong Bombo Blood Letting Activities ang pila ka mga pamilyar na nga mga nawong, partikular na ang mga ginakabig na nga Bombo galloner, ukon nakadonar na sang ginallon nga dugo sa aktibidad sang Bombo Radyo Philippines, in partnership sa Bombo Radyo Philippine Foundation Inc. kag Philippine Red Cross.
Si Leonard Diamante Malaluan sang Brgy. II, La Carlota City, Negros Occidental, wala gid naga-absent sa Dugong Bombo.
Subong nga 2026, ini na ang ika-19 niya nga pagdonar sa bloodletting activity sang Bombo Radyo.
Siya ang may Type A nga blood type nga iya man nga ginadonar sa mga nagakinahanglan.
Sa malawig nga tinuig nga panata, madamo naman sang nabuligan ang iya dugo kalakip na ang mga himata, abyan, kag ka-trabaho.
Si Malaluan ang isa ka contract of service employee sa Bureau of Plant Industry National Seed Quality Control Services sa La Carlota City.
Samtang ika-13 naman nga pagdonar sang dugo sa Dugong Bombo sang 61 anyos nga si Antonio Labtic sang Regent Pearl, Brgy Alijis, Bacolod City.
Siya ang avid listener sang Bombo Radyo Bacolod, kag humalin paman sadto, panata na niya nga makigbahin sa Dugong Bombo, gani ginabantayan gid sini ang announcement sa radyo.
Siya ang temprano man nagtulog kagab-i agud nga kondisyon ang iya lawas kag maseguro nga makapasar sa screening.
Aminado si Labtic nga tinalikdan nga tuig dyutayan lamang sini mamiss ang blood donation bangod sa trabaho.
Apang indi ini mahim-os nga malat-angan ang iya nga panata gani siya ang naghingagaw gid sang mag-lunch break.
Si Labtic ang may A+ nga blood type.
Isa man sa rasun sang iya tuigan nga pagdonar ang panigana, agud ini ang may magamit inkaso may-ara sang himata nga magakinahanglan sang dugo.
