Gin-engganyo ni President Ferdinand “Bongbong” Marcos Jr. ang mga negosyante kag mga investors sa ASEAN nga magbinuligay agud mapasanyog ang ekonomiya kag makatuga sang dugang nga trabaho sa rehiyon.
Sa iya speech sa ASEAN Business and Investment Summit 2026 sa Pilipinas, ginhatagan pagtamod sang Presidente ang importansya sang responsable nga paggamit sang Artificial Intelligence (AI) agud mapasanyog ang negosyo kag serbisyo sa mga pumuluyo.
Suno kay Marcos, kalakip sa prayoridad sang Pilipinas amo ang paggamit sang AI agud mabuligan ang mga magagmay nga negosyo nga mapasangkad ang ila operasyon kag mapasanyog ang serbisyo sa ikaayong lawas.
Gin-engganyo man sini ang mga dalagku nga kumpaniya kag mga manugpuhunan nga suportahan ang magagmay nga mga negosyo paagi sa pagpaambit sang ihibalo, teknolohiya kag mga oportunidad.
Ginpasalig sang Presidente nga ang Pilipinas magapadayon sa pagpakig-angot sa mga pungsod sang ASEAN agud mapabaskog ang ekonomiya, makatuga sang trabaho kag mahatagan sang mas maayo nga palaabuton ang mga pumuluyo.
Sa pihak nga bahin, ginpirmahan na ni President Ferdinand “Bongbong” Marcos Jr. ang Executive Order No. 131 nga nagaestablisyar sang Artificial Intelligence (AI) Governance Framework kag nagatukod sang National Artificial Intelligence Council.
Katuyuan sang nasambit nga framework nga mapanginpuslan sang husto ang potensyal sang AI agud makabulig sa mga negosyo, komunidad, kag mga manog-ubra samtang ginasiguro ang ethical kag responsable nga paggamit sini.
Suno kay Palace Press Officer Usec. Claire Castro, ginpirmahan sang Presidente ang executive order sadtong Nobyembre 12.
