Pila sa mga nasunugan sa Talisay City, nagapanawagan sang bulig
-- ADVERTISEMENT --

Tatlo ka balay ang gintupok sang kalayo sa Sitio Nacab, Brgy Bubog, Talisay City kapin alas-10:0 kagab-i.

Sa interview sang Bombo Radyo Bacolod kay Rosewell Bebita Arroyo, isa sa mga nasunugan, ang kalayo ang gikan sa balay sang kaingod nila nga Barangay Kagawad.

Pahayag sini nga sila ang gintawag lamang sang bata sang Brgy Kagawad agud pahibaluon nga may nagaluntad na nga sunog.

Sang magtamwa ang iya bana, nakita sini nga nagabaga na ang ila dingding nga human sa hardiflex.

Suno kay Arroyo, ang ila nga balay gid ang natam-an bangod human sa light materials.

-- ADVERTISEMENT --

Wala gid ang mga ini sang nasalbar luwas sa ila kaugalingon.

11 tanan ang tawo gikan sa tatlo ka balay, nga ginalakipan sang lima sa balay sang Kagawad, tatlo sa ila, kag tatlo sa balay sang iya umagad.

Masakit para kay Arroyo nga makita nga ginatupok ang ila balay, bangod ini ang iya ginpundar sa duha ka tuig kag tunga nga pagtrabaho sa Manila.

Sadto sila ang nagapuyo sa higad sang baybay, apang gindemolish ang ila balay, gani sila ang nagsaylo sa area.

Sa karun, sila ang nagatulog na lamang sa balay sang iya tiya.

Sa pihak sang trahedya, nagapasalamat na lamang si Arroyo nga wala sang wala sang ginbawian sang kabuhi sa ila nga pamilya, bangod ang mga pagkabutang nga nasunog ang masarangan lang liwat nga mapundar.

Si Arroyo ang sang Setyembre lang na-operahan matapos ginpakuha ang iya matres nga nag-bleeding.

Suno sa iya, maayo na ang iya kondisyon matapos sang operasyon, apang naglain ang iya pamatyag sang matabo ang sunog kagab-i.

Panawagan sini sa Talisay City Government nga sila ang mabuligan sa liwat nga pagpatukod sang balay.

Nagapanuktok man ini sa tagipusuon sang mga Talisaynon kag iban pa, nga sila ang mabuligan sa magamit sa pang-adlaw adlaw partikular na sa pagkaon kag panapton bangod wala gid sila sang bisan isa nga nasalbar gikan sa ila nga balay.

Sa kaangot nga balita, nagapanawagan man sang bulig ang mag-asawa nga sanday Willie kag Rosalina Bebita nga naulamid man ang balay sa sunog sa Sitio Nacab, Brgy Bubog, Talisay City kagab-i.

Sa interview sang Bombo Radyo Bacolod sa mag-asawa, ginalantaw nila nga nag-init nga saksakan ang gintunaan sang sunog sa balay ni Barangay Kagawad Bong Cordero.

Apang wala pa nakapagwa sang kumpirmasyon ang Bureau of Fire Protection (BFP) – Talisay City angot sa rasun sang sunog.

Suno sa mag-asawa nga Bebita, nagakatulog na sila sang mabatian nga may nagsinggitan sang sunog, gani wala gid sila sang may nasalbar kag natupok gid ang ila nga balay.

Sila ang temporaryo nga ginpatulog sa balay sang ila punong barangay, apang wala man sila makatulog bangod ginapinsar sang mga ini ang nadula nga puluy-an.

Pahayag sang mga ini nga sila ang naga-istar na sa lugar humalin pa sang 1976, samtang tatlo sila ang nagapabilin sa balay, sila nga mag-asawa kag ang ila bata nga may nervous breakdown.

Naubos man ang ila nga mga gamit sa gamay nga bakery.

Nagapanawagan ang mag-asawa sa Talisay City officials, opisyales sang Barangay, kag sa mga may bulawanon nga tagipusuon nga kun mahimo sila ang mabuligan, bangod wala gid sang may nabilin sa ila.

Sarang man mapadala sa ila ang bulig paagi sa gcash number 09630542196.