Ginakondinar sang Bayan Muna ang Marcos Administration bangod sa paggwapo sa atubang sang foreign dignitaries samtang ginadaog-daog ang mga pumuluyo nga Pilipino.
Sa interview sang Bombo Radyo Bacolod kay Atty Carlos Isagani Zarate, Executive Vice President sang Bayan Muna, gintawag sini nga epokrito kag pasista ang Marcos Administration.
Ini matapos maggastos sang bilyon-bilyon nga pondo para sa 2026 Association of Southeast Asian Nation (ASEAN) Summit, samtang tuman ka damo sang halos indi makakaon sang duha ka beses sa isa ka adlaw.
Suno diri, sa mga ginlabayan sang foreign dignitaries, ginpatabunan pa sang administrasyon ang mga slum areas.
Pahayag sini, nga gindingotan man sang constitutional rights ang mga pumuluyo nga makaprotesta paagi sa pagpadala sang masobra 20 mil nga kapulisan, kag may augmentation pa sang militar.
Ini ang nagresulta sa pagka-aresto sang halos 300 nga ralliyista.
Panindugan ni Zarate nga may-ara sang basihan ang pagprotesta sa pagtambong ni US President Donald Trump, bangod ini ang mayor nga rasun sa global crisis.
Pahanumdom niya nga yara sa konstitusyon ang pagpahanugot sa mga tawo nga mapabutyag ang ila kalain sang buot sa gobyerno, kag usik lamang sang government resources ang pagpasaka nila sang kaso.
Ini bangod halos kalabanan sang mga ginakasuhan may kaangtanan sa pagprotesta ang ginadismiss man sa korte, apang ang proseso ang nagalawig sang tinuig antes pa mabasura.
Dugang pa sini nga luwas kay President Ferdinand “Marcos” Jr., pasista man ang isip ni Philippine National Police (PNP) Chief Jose Melencio Nartatez Jr. kag ni Department of the Interior and Local Government (DILG) Secretary Jonvic Remulla nga ‘overkill’ sa paggamit sang pwersa batok mga naga-protesta.
Suno kay Zarate, maathag nga mas prayoridad ni President Ferdinand “Marcos” Jr. nga makapahamot sa America, nga makonsiderar na sini nga kaangay sang ‘slave’ mindset.












