Patay ang driver sang motorsiklo matapos mabungguan ang tatlo ka mga nagatabok sa dalan sa Brgy. Mandalagan, Bacolod City sang Domingo sang gab-i.
Ang tatlo ka mga nabungguan ang ginkilala kanday Alyas Joylen 20 anyos, residente sang Sitio Tumpok, Barangay Bata, Bacolod City; Alyas Jasmine, 23 anyos, residente sang Purok Riverside, Barangay Banago, Bacolod City; Alyas Ronie, 23 anyos, kag residente sang Purok Riverside, Barangay Banago, Bacolod City
Samtang ang driver sang motorsiklo ang ginkilala kay Alyas Lawrence ,23 anyos, kag ang angkas sini ang ginkilala isa ka 14 anyos, minor, lunsay mga residente sang Purok Carvic, Barangay Mandalagan, Bacolod City.
Sa imbestigasyon, samtang nagatabok ang tatlo nabungguan ang mga ini sang motorsiklo nga ginamaneho ni alyas Lawrence.
Bangud sa impact, nakaangkon sang pilas sa lawas ang tatlo ka mga nagatabok kasubong man ang driver sang motorsiklo kag ang angkas sini.
Nadapatan ang mga ini sang first aid sang nagresponde nga Bacolod Rescue Teams kag gilayon man nga gindala sa Regional Hospital para sa dugang nga pagbulong apang makaligad ang isa ka oras napatay si alyas Lawrence samtang ang tatlo ka pedestrians kag ang menor de edad nga angkas sa motorsiklo ang padayon nga nagapaayo sa ospital.












