Pabor ang transport leader sa ginduso sang Japan nga Joint Oil Stockpiling sa Association of Southeast Aisan Nation Secretariat (ASEC) member countries.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters Operators and Drivers – Negros Island Region (BACODNI-Manibela), ang sektar nga tuman ka naapektuhan sang madasig nga pagsaka sa presyo sang produktong petrolyo amo ang transport sector.
Gani importante nga may-ara sang iban nga makuhaan sa mga tion nga may problema sa major source sang oil supply nga amo ang middle east.
Madumduman nga nagtimbook ang presyo kasunod sang paglala sang gyera sa middle east, kag risgo sa mga nagalabay sa strait of hormuz.
Panindugan ni Catedral nga dapat suportahan sang Department of Energy ang lihok, kag magtalana gid sang budget.
Suno diri, dapat nga magtigana sang reserve fuel ang gobyerno kag indi magsalig sa mga gasoline company.
Pahanumdom niya nga nagapamintaha ang mga oil companies, kun sa diin apisar nga madugay na nga nabakal ang ila nga stocks, hinali magsaka ang presyo sa world market ini ang gilayon man nga gina-implementar.
Samtang, may-ara pa sang nagabalibad nga magpatuman sang rollback sa panindugan man nga daan ang ila fuel supply.
Nagapati si Catedral nga masarangan gid mapondohan ang para sa reserve fuel bangod may pondo ang gobyerno nga ginakurakot lamang.
Samtang ginalantaw man nila nga mahimo magpamatok si President Ferdinand Marcos Jr sa lihok, sa rasun nga indi na sila makapangurakot bangod mamonitor sang iban nga pungsod.
Apang panawagan nila nga dapat makita man sini nga suportado sang mga pumuluyo ang Joint Oil Stockpiling, bangod ini ang magaserbe nga option sang pungsod sa tunga sang oil crisis.
Dugang pa niya nga dapat lantawon sang Presidente ang makabenepisyo sa publiko, kag indi lamang ang benepisyo sang fuel companies.












