Senator Raffy Tulfo, ginbatikos ang kredibilidad ni Defense Expert Witness Atty Rainer Dela Fuente
-- ADVERTISEMENT --

Ginkwestyon ni Senator-judge Raffy Tulfo ang kalaparon sang ihibalo kag mga kwalipikasyon ni Atty. Rainer Dela Fuente, nga ginpresentar bilang testigo sa bahin sang depensa sa impeachment trial ni Vice President Sara Duterte.

Ini matapos ginpamangkot ni defense lawyer Atty. Mark Vinluan si Dela Fuente angot sa mga pahayag sang amici curiae ukon mga indibidwal nga nagahatag sang expert testimonies sa korte sa isa ka partikular nga subject.

Sa tunga sang pagpamangkot, nagpabutyag si Tulfo nga siya ang nagakatingala kun ngaa kaangay nga nagakasabat ni Dela Fuente ang nanari-sari nga topiko, kalakip ang nahanungod sa amici curiae, Korte Suprema, Office of the Ombudsman, kag Department of Justice (DOJ).

Panindugan sang senator-judge nga luyag niya nga mahibaluan kun ano ang mga kwalipikasyon ni Dela Fuente agud masabat ang malapad nga sakop sang mga topiko nga ginapamangkot sa iya sang depensa.

Liwat nga ginbanatan ni Senator-judge Raffy Tulfo ang testimonya ni Dela Fuente matapos ginkumpirmar ni Vinluan nga wala niya nahatagan sang kopya ang testigo sang forensic report nga ginpreparar ni Atty. Alex Cabrera antes mag-atubang sa impeachment trial ni VP Sara.

-- ADVERTISEMENT --

Suno kay Tulfo, indi dapat kontrahon ukon i-refute ni Dela Fuente ang mga natukiban sang forensic expert kun wala naman sini nabasa ukon natsekyar ang mga dokumento nga gingamit sa nasambit nga imbestigasyon.

Ginklaro sang senador nga wala sa posisyon ang testigo nga maghatag sang pagtutol sa nasambit nga report kun wala niya nahibaluan ang kaundan.