Magnitude 4.5 nga linog sa Iloilo, nabatyagan sa Bacolod City kag Negros Occidental; BPO employees, napilitan nga magpanaog sa 14th floor sang building
-- ADVERTISEMENT --

Nabatyagan sa pila ka bahin sang Negros Occidental kag Bacolod City ang magnitude 4.5 nga linog sa Anilao, Iloilo alas-5:11 kaina sang aga.

Sa interview sang Bombo Radyo Bacolod kay Ruth Asentista, Project Technical Aide VI sang Philippine Institute of Volcanology and Seismology – Negros Island Region ( PHIVOLCS-NIR), ang linog ang may kadalumon nga 15 kilometros, kag ini ang tectonic in origin.

Nabatyagan ang Intensity 4 sa ciudad sang Bago diri sa Negros Occidental; Jordan, Guimaras; kag Passi City, Iloilo.

Intensity 3 sa La Carlota City, Negros Occidental; Nueva Valencia, Guimaras; kag Tapaz, Capiz.

Intensity 2 naman sa Bacolod City; San Lorenzo, Guimaras; kag Jamindan, Capiz.

-- ADVERTISEMENT --

Panugyan ni Asentista, wala sang expected aftershock, apang mangin mabinantayon gihapon bangod may kakusugon ang 4.5 magnitude nga linog.

Pahanumdom pa niya nga sa tion sang linog, tinguhaan nga makapalayo sa mga matag-as nga buildings. Samtang, nagpalanaog kag wala na nagbalik pa sa trabaho ang pila ka call center agents sa Barangay Mandalagan, Bacolod City matapos sang 4.5 magnitude nga linog sa Anilao, Iloilo nga nabatyagan bisan sa Bacolod City.

Sa interview sang Bombo Radyo Bacolod kay Alyas Jane, sila ang sa 14th floor pa sang building nagatrabaho.

Bangod sa linog, naghingagaw ang mga ini panaog, ilabi na nga sila ang may trauma na sang nakaligad nga mga linog.

Ginapakamaayo na lamang nila nga wala na sang nalipong indi kaangay sang nakaligad.

Suno kay Jane, ginpabalik pa sila sa trabaho sang mag-untat ang pagtay-og apang wala na sang luyag nga magbalik bangod sa kahadlok.

Pahayag sini nga alas-8:00 sang aga pa kuntani ang ila nga out sa trabaho, apang ang pagtay-og ang natabo alas-5:11 kaina sang aga.