Padayon subong ang pagbaton sang Bureau of Jail Management and Penology Negros Island Region sang application para sa jail officer 1 nga iga-assign sa Negros Occidental, Negros Oriental kag Siquijor.
Sa interview sang Bombo Radyo kay Jail Senior Inspector Juniven Rey Umadhay, spokesperson sang BJMP Negros Island Region, may yara sang 170 slots para sa dugang nga jail officer 1 nga ginalakipan sang 135 males kag 35 females.
Sarang maka-apply ang bona fide Filipino citizen, 21 to 30 years old, may good moral character kag wala naconvict sa crime involving moral torpitude, kag may second-level civil service eligibility.
Gin-engganyo ni Umadhay ang mga manunudlo, nurses, kag psychologist nga mag-apply sa BJMP.
Ang mga applicants ang magalabay sa neuro-psycho exam kag apat ka bulan nga training.
Suno kay Umadhay, ginlakip ang neurological examination bangud may mga jail officers nga gina-isyuhan sang service firearm.
Ginpanugyanan man sini ang mga applicants nga ipabilin ang fitness bangud kabahin sang process ang physical fitness training.
Ang mga personnel sang BJMP ang may maayo nga sweldo kun sa diin nagadangat sa P41,000 ang gross pay kada bulan lakip na ang basic salary kag allowances.
Nagpanawagan man ini sa mga applicants nga indi magpati sa mga fixer bangud libre ang application sa BJMP.
Ginpahanumdom man sini ang memorandum circular sang BJMP nga nagadumili sang tattoo sa exposed nga parte sang lawas.
Sarang nga makapasa sang application tubtub sa Enero 31.
Nagakinahanglan man ang BJMP NIR sang doctors, abugado kag pari nga magasulod paagi sa lateral entry kun sa diin jail senior inspector ang mangin ranggo sini.






