Former PBA champion PJ Simon, nagtaliwan na
-- ADVERTISEMENT --

Nagtaliwan na sang Biyernes ang anay PBA champion nga si Peter June “PJ” Simon sa edad nga 46.

Ini ang ginkumpirmar sang Magnolia Hotshots kahapon sang Sabado.

Antes sini, gindala pa sa ospital ang basketball player matapos malipongan sa isa ka hampang sa Davao City.

Suno sa anay PBA veteran nga si Alvin Pasaol, gin-atake sa corazon si Simon.

Wala pa sang pahayag ang pamilya sang player angot sa pagkamatay sini.

-- ADVERTISEMENT --

Samtang ginpahayag sang koponan nga isa sa PJ sa pinakamaayo nga ehemplo sang isa ka professional basketball player nga indi malimtan, may pagsalig sa kaugalingon, mapainubuson kag nangin bugal ang pagsuksok sang number 8 nga jersey nga naghatag sang inspirasyon sa kadam-an.

Nagpalab-ot naman sang pakig-unong ang koponan sa pamilya ni Simon.

Walo ka beses nga nangin kampeon sang PBA si Simon.

Nangin kabahin man siya sang San Mig Coffee Mixers nga nagdaog sa Grand Slam sang 2014 Philippine Cup, 2014 Commissioner’s Cup, kag 2014 Governors’ Cup.

Naupod man ni Simon ang Mythical Second Team sang 2014 kag walo ka beses nga napilian bilang PBA All-Star.

Sang 2020, gin-anunsyar ni Simon ang iya pagretiro sa basketball.