May yara pa sang patigayunon nga ikatatlo nga pagmartsa ang nagkalain-lain nga sektor sa December 10 kadungan sang International Human Rights Day.
Sa interview sang Bombo Radyo Bacolod kay Bayan Muna Negros spokesperson Noli Rosales, wala natapos ang ila nga kampanya batok sa korapsyon kahapon nga adlaw sa ginpatigayon nga Trillion Peso March bangud liwat sila nga magatipon kag maga-martsa sa December 10 agud nga mapalab-ot sa international ang ila nga kampanya batok sa mga anomalya sa pungsod.
Suno kay Rosales, sa ila nga assessment mas madamo ang nag-upod sa ila kahapon kun ipaanggid sa nag-upod sang September 21.
Suno diri ang ila ginlauman nga 12,000 ka magatambong ang ila man nga nalapawan.
Dugang pa sini nga mas padakuon pa nila ang ginapatigayon nga mga aktibidad kadungan sang International Human Rights Day.
Suno diri, luyag nila nga ipakita nga miyentras nga wala sang mapriso nga dalagko nga mga politiko bangud sa korapsyon indi sila mag-untat sa pagpanawagan.
Sa December 10, liwat nila nga engganyuhon ang Diocese of Bacolod nga liwat sila updan sa ila patigayunon nga pagmartsa sa December 10.
