Nakigbahin man ang lead convenor sang Amlig Tubig kag Amlig Kuryente sa ginpatigayon nga rally nga ginpangunahan sang mga transport groups kaina sang aga.
Sa interview kay Christian Weber nga miyembro man sang Council of Concerned Citizens (C3) kag One Negros Ecumenical Council (ONEC), humalin pa sang tuig 2019 nila ginapanawagan nga kakason na ang 12 percent tax sa tubig bangod ini basic necessity sang tawo nga wala na dapat ginakuhaan pa sang tax.
Suno diri, ginapanawagan man nila ang temporaryo nga pagsuspender sang excise tax nga naga-apekto sa tanan.
Suno kay Weber, kun maayo ang resulta sang ila ginpatigayon nga rally, tanan man ang makaganar bisan sa makadali lang nga tion.
Samtang, nagpanawagan man ini sa local government unit sang Bacolod City nga buligan sila mapalab-ot kay president Ferdinand Marcos Jr ang ila sentimento agud mahatagan sang solusyon sang krisis. Samtang, ginpahayag naman ni Fr Arman Onion, Island Coordinator sang One Negros Ecumenical Council (ONEC) nga ang kahimtangan sang pumuluyo amo ang kahimtangan sang katawhan sang Diyos subong nga may yara sang krisis.
Sa interview sang Bombo Radyo kay Onion chairman sang Broad Alliance manindigan sang Human Rights, kag Kura Paroko sang St. Joseph the husband of Mary Parish, indi lamang ang Roman Catholic ang yara sa rally kaina apang nag-upod man sa panawagan ang Aglipayan Church, mga kaparian, mga madre, mga pamatan-on, mga katigulangan, kag ang tanan nga apektado sang krisis.
Kaina pagpadulong ni Fr Onion sa Magsaysay flyover sa barangay Singcang Airport, nagsakay ini sa tricycle nga may tarpaulin nga “Tricycle ni Maria” kag may dala sila nga estatwa ni Birhen Maria.
Suno diri, mismo si Pope Leo XIV na ang naghambal nga ang problema sang inaway sang mga pungsod makabig nga immoral kag ang solusyon diri amo ang pagtingob sang mga pumuluyo.
Pahayag sini, ang mga pumuluyo gid ang namigado bangod sa giyera kag ang korapsyon sa gobyerno ang nagpalala pa gid sa problema sa krisis.
Ila man ginapangamuyo nga matandog ang balatyagon sang mga opisyales para magtuman sa ila obligasyon sa katawhan.
Samtang, may yara sang patigayonon nga conference ang mga kaparian alas- 5:30 subong nga hapon para mag-esturya angot sa excise tax kag value added tax.
