Ginalantaw sang abogado nga indi na padalman sang International Criminal Court ang nahanungod sa proseso sang pag-aresto kay former President Rodrigo Duterte, sa baylo ang tutukan amo ang jurisdiction sang ICC sa Pilipinas.
Sa interview sang Bombo Radyo Bacolod kay Atty Levito Baligod, santo sa ICC Charter kag sa ila nga rules and procedures, kun may arestuhon, dapat nga respetuhon kag magsunod sa layi sang local state.
Kasunod sang pag-aresto, ang indibidwal ang ipa-atubang sa local court agud maverify kun husto ang proseso sang pagserbe sang warrant of arrest.
Apang sa baylo, si Duterte ang ginderetso sa Netherlands, kag bisan magpagwa pa sang desisyon ang Korte Suprema, ini ang indi na aplikable sa nasambitan nga pungsod.
Suno kay Baligod, nakadepende na sa huwis sa Netherlands kun pamatian nil ang argumento nga indi husto ang paagi sang pag-aresto.
Kag kun mapamatud-an, yara ang posibilidad nga ibalik anay sa Pilipinas si Duterte agud masunod ang due process.
Apang nagapati si Baligod nga sa kaundan sang warrant of arrest, wala ginpadalman ang procedural aspect kundi ang ICC ang nakatutok sa content sang “crime against humanity” may kaangtanan sa implementasyon sang war on drugs.
Gani ginalantaw sini nga mas hatagan sang bug-at ang argumento tuhoy sa jurisdiction sang ICC sa Pilipinas.
Pahanumdom sang abogado nga makapasilabot lamang ang ICC kun wala nagafunction ang judicial system sang isa ka pungsod.
Apang wala man lang bisan isa ka bes nga may nagfile sang complaint sa Pilipinas, sa baylo ini ang ginderetso sa ICC sa pagpanguna ni former Senator Antonio Trillanes IV, nga ginpondohan sang isa ka negosyante.
Isa sa halimbawa nga nagafunction ang judicial system amo ang kaso sang gina-alegar war on drugs victim nga si Kian Delos Santos, kun sa diin naconvict ang mga pulis nga nakapatay sa biktima.
Paathag sini nga bangod nagafunction ang judicial system sang Pilipinas, wala sang jurisdiction ang ICC nga mag-intra sa mga krimen nga nakomiter sa pungsod.
Suno diri, ginapoliticize kag internationalize lamang sang kontra sa politika ang anay Presidente.
Ginkontra man sini ang pahayag ni former Senator Juan Ponce Enrile nga indi suportado sang layi ang war on drugs.
Suno kay Baligod, bisan sin-o nga Presidente ang nagapanumpa nga ipatuman ang layi sa pagpakig-away sa illegal nga droga kag ini ang mapamatud-an nga National policy nga ginahimo man bisan sang iban nga mga pungsod.
Samtang indi man husto suno diri ang pahayag ni President Ferdinand “Bongbong” Marcos Jr nga indi bangod sa ICC kun ngaa ginpa-aresto si Duterte kundi bilang pagkooperar sa Interpol.
Apang pahanumdom ni Baligod nga sa Interpol charter, information sharing kag information gatherings lamang ang ginarequest sa pungsod kag indi ang pag-aresto sa gindagdagan sang yellow ukon red notice.
