Ginpahayag ni Atty. Stephen David nga wala na ini sang komunikasyon sa iya kliyente nga si dismissed Bamban, Tarlac Mayor Alice Guo.
Madumduman nga sang tinalikdan nga semana, nagpanindugan si David nga yari pa sa Pilipinas si Guo matapos ginpakigbahin sang mga Senador nga nagbiya na sa pungsod ang anay alkalde kag nagpadulong sa Malaysia, Singapore kag Indonesia.
Suno kay David, pila ka adlaw na ini nga wala sang komunikasyon sa iya kliyente.
Wala man ini naghatag sang komento natuhoy sa statement nagikan sa Presidential Anti-Organized Crime Commission (PAOCC) nga nagasuhestiyon nga si Guo ang posible padulong sa Golden Triangle, isa ka rehiyon nga notorious bangud sa krimen kag kontrolado sang mga sindikato kag triads sa Cambodia, Myanmar kag Laos.
Una na nga ginpahayag ni PAOCC Spokesperson Winston Casio nga may yara sang business interest ang pamilya ni Guo sa Cambodia.
Suno diri, sila ang kabahin sang dako nga criminal organization nga kilala bilang Fujian Gang nga naangot sa Golden Triangle triad.
Ginmando sang Office of the Ombudsman nga madismiss si Guo nagikan sa government service subong nga bulan bangud sa grave misconduct bangud sa kaangtanan sini sa illegal Philippine Offshore Gaming Operator sa Bamban.
