Emosyonal ang coordinator sang Altermidya National samtang ginapanindugan nga indi miyembro sang rebelde nga New People’s Army si RJ Nichole Ledesma, ang 7th nominee sang Kabataan Partylist sang 2022 election, nga isa man ka poet, journalist kag human rights advocate.
Sa press conference nga ginpangunahan ni Altermidya National Coordinator Avon Ang, ang media ang kaangay man sa sitwasyon sang yara sa komunidad nga luyag magpabutyag sang ila nga mga hibubun-ot kag reklamo, apang ginapahog kag ginapatay.
Panindugan sini nga ginagamit nga platform ni Ledesma ang social media sa pagtukod sini sang Paghimutad Negros, kun sa diin makita ang pagtalakay sini sa mga balika kaangay sa mga mangunguma nga plano nga idemolish bangod sa solar project, mangunguma nga ginsunog ang balay sang gina-alegar military arson, bata sang mangunguma nga ginpatay sang suldado sa Calatrava kag iban pa.
Suno diri, indi na bag-o ang balita tuhoy sa pagpatay sang sibilyan, pagtanom sang armas, bangod ini ang nagakatabo sa nagkalainlain nga bahin sang pungsod, nga kahimuan sang Armed Forces of the Philippines.
Hangkat sini sa AFP nga sabtun ang mga dokumented pattern, kalakip na ang pagpatay sa mga abogado kag human rights workers.
Pahayag ni Ang nga apisar illegal ang magtanom sang armas kag illegal ang pagpatay sang sibilyan, ini ang ginahimo sang militar, kag wala man lang sang napapanabat ukon napriso.
Aminado si Ang nga dako ang nadula sa ila sa pagkamatay ni Ledesma, apang nagapati ini nga madamo sang magapadayun sang nasuguran sini.
Pahayag sini nga apisar sa mga pagpamahog kag risgo, gintindugan ni Ledesma ang pagpagwa sang mga balita nga pilit nga ginatago sang mga yara sa gahom.
