Nadugangan sang duha ang ginakabig probable COVID 19 patients nga naadmit sa karon sa ospital sa ciudad sang Bacolod.
Sa data nga ginpagwa ni Dr. Grace Tan, spokesperson sang Inter-Agency Task Force Against Coronavirus sang Bacolod, ang duha ka probable COVID 19 patients ang ginalakipan sang 64 anyos nga lalaki kag 31 anyos nga lalaki nga lunsay wala sang travel history sa lugar nga may positibo nga kaso sang balatian kag wala man nakapalapit sa persona nga nagpositibo sa coronavirus.
Nabudlayan ang duha nga magginhawa gani sila ang nagpaospital.
Sa karon, ginahulat pa ang resulta sang laboratory test nga ginpatigayon sa swab sample nga ginkuha sa ila.
Tinalikdan nga adlaw, may duha ka probable COVID 19 patients nga narekord ang Bacolod City Health Office nga ginalakipan sang mga lalaki nga naga-edad 58 kag 35.
Suno sa BCHO, wala sang travel history sa iban nga mga lugar ang mga pasyente kag wala man sang close contact sa COVID positive patient.
Kahapon, nagpadala ang BCHO sang 40 ka swab sample sa COVID testing laboratory sa ciudad sang Iloilo.
Madumduman nga pito na ang kumpirmado nga kaso sang COVID 19 sa ciudad sang Bacolod kag isa ang napatay.
