Ginpaandaman sang secretary sang Department of Agriculture ang mga traders nga nagahimo sang tikang agud mabutang sa delikado ang ikaayong lawas sang mga consumers.
Ini ang kasunod man sang natukiban sang Bureau of Plant Industry (BPI) nga nagpositibo sa pesticides kag heavy metals ang mga ginpalapaw nga mga utan sa Navotas.
Sa nasambit nga insidente, masobra 300 ka tonelada nga white onions, carrots, kamatis kag enoki mushrooms ang narekober gikan sa makeshift cold storage facilities kag 40-footer container van sa tunga-tunga sang Agosto bangud sa kakulang sa sanitary and phytosanitary import clearances para sa pag-import.
Suno kay Department of Agriculture (DA) Secretary Francisco Tiu Laurel Jr., ginatun-an na subong sang legal team sang ahensya ang ipasaka nga kaso batok sa mga nagapamentaha nga traders.
Samtang suno naman kay Plant Industry Director Gerald Glenn Panganiban, nagpositibo ang mga utan sa nagkalain-lain nga pesticide residues nga “harmful to humans,” kalakip na ang organophosphates, organochlorines, kag pyrethroids, mangin ang heavy metals kaangay sang cadmium kag lead.
Magluwas diri, natumod man ang microbial contaminants kalakip na ang E. coli, Listeria monocytogenes, kag Salmonella.
