Ginpahayag ni Manila Representative Joel Chua nga posible nakahimo sang election offense si Vice President Sara Duterte kun mapamatud-an nga nakabaton ini sang pondo para sa iya kampanya sang 2022 gikan sa mga Chinese nationals nga may kaangtanan sa Pharmally.
Suno sa Omnibus Election Code, ginadumilian ang mga foreign nationals nga mag-amot sa mga kampanya, kag ilegal man para sa mga kandidato nga magbaton sang amo nga mga donasyon.
Dugang pa ni Chua, mahimo magresulta ini sa culpable violation sang Konstitusyon kag klaro nga paglapas sa election laws kon mapamatud-an nga foreign nationals ang mga imbolbado.
Base sa affidavit ni Ramil Madriaga nga nagpakilala nga anay bagman ni Duterte, nakabaton ini sang minilyon gikan kay Lin Weixiong kag sa mga negosyante nga sanday Tony Yang kag Michael Yang para sa mga campaign activities.
