Liwat nga nagpatigayon sang meeting ang Bacolod City Legal Officer sa personnel sang Bacolod City Legal Enforcement Team sa pag-emphasize nga dapat ipatuman ang mga pagsulundan sang ciudad sa mga merkado apang may pagrespeto kag pagpakanubo.
Sa interview sang Bombo Radyo Bacolod kay Retired Police Col. Levy Pangue, Focal Person sang Bacolod City Legal Enforcement Team, personal nga ginpadulungan ni Bacolod City Legal Officer Atty. Karol Joseph Chiu ang Libertad Public Market agud nga klaruhon ang natabo matapos nga naglapta sa social media ang video nga kaangay ginapakita nga nagapamunpon sang ginabaligya nga panakot ang isa ka personnel sang Bacolod City Legal Office.
Suno kay Pangue, ginklaro sang nagabaligya nga nagbayad ang personnel.
Dugang sang focal person sang Bacolod City Legal Enforcement Team nga may duha ka team ang nagaduty sa tatlo ka merkado sang ciudad nga ginalakipan sang Burgos, Central kag Libertad Public Market.
Suno kay Pangue, halin sa pagbukas tubtob sa pagpanira sang mga balaligyaan sa merkado nagabantay ang mga City Legal Enforcement Team personnel kag hugot nga ginapatuman ang mga ordinansa sang ciudad.
Ginpahayag man sini nga wala naman sang nagapasaway humalin sang tinalikdan nga may isa ka personnel nga nagpasaway nga gilayon man ginpahalin.
Suno kay Pangue, ang luyag ni Atty. Chiu nga magserbisyo sang may pagpakanubo kag indi ang papuder kag abusado.
Masami man nga ginapanugyan sini sa mga personnel nga magserbisyo sang insakto kag siguruhon nga indi mahuy-an ang nagpasulod sa ila agud makaserbisyo sa ciudad.












