Narelease nga financial assistance sa mga small sugar farmers kag laborers nga nahalitan sang RSSI, nagdangat sa P1.4 billion
-- ADVERTISEMENT --

Nagdangat na sa masobra P1.4 billion ang na-release nga financial assistance sang Department of Social Welfare and Development (DSWD) sa kapin 140,000 ka mga small farmers kag laborers sa Negros Island Region sa apektado sang Red-Striped Soft Scale Insect.

Sa interview kay DSWD Negros Island Region Director Arwin Razo, ginatapos nalang nila releasing sang financial assistance sa mga replacements kag ginaproseso naman nila ang releasing para sa mga additional beneficiaries.

Suno kay Razo, ginabanta nga matapos ang releasing sa ikaduha nga semana sa bulan sang Disyembre.

Dugang pa sini nga P2 billion ang ginhingyo nila nga pondo para ipanagtag bilang financial assistance sa mga apektado sang peste nga Red-Striped Soft Scale Insect (RSSI) sa rehiyon.

Ginpahayag man sini nga ang kalabanan nga wala mahatagan sang financial assistance amo ang mga sugar farm laborers.

-- ADVERTISEMENT --

Suno pa diri may yara pa sila sang mga Local Government Unit nga natalana nga balikan kaangay sang Kabankalan City, Don Salvador Benedicto sa Negros Occidental kag Mabinay, Negros Oriental bangud wala pa naubos ma-releasan ang mga beneficiaries.

As of November 14, nagdangat na sa P1,439,654,725 ang napanagtag sa 75,174 farmers kag 64,659 laborers sa Negros Occidental, Negros Oriental and Bacolod City.

Ang pinakadako nga napanagtagan amo ang Negros Occidental kun sa diin nagdangat sa P1,201,912,600 ang napanagtag sa 116,408 beneficiaries nga ginabug-usan sang 59, 072 farmers kag 57, 336 laborers.

Sa Bacolod City, nga una na nagdeklarar sang state of calamity bangud sa RSSI infestation, nagdangat sa P29,116,500 ang financial assistance nga ginpanagtag sa 2,820 beneficiaries, nga ginalakipan sang 1,232 farmers kag 1,588 laborers.

Nagbaton naman ang Negros Oriental sang P208,625,625 para sa 20,605 beneficiaries, nga ginabug-usan sang 14,870 farmers kag 5,735 laborers.