Gina-imbestigaran subong sang National Bureau of Investigation (NBI) ang mga alegasyon sang isa ka former member sang Philippine National Police (PNP) nga nagserbe bilang security officer ni former House Speaker Lord Allan Velasco.
Suno kay Police Corporal Rodulfo Gracioso Jr., gin-alegar nag-deliver ini sang minaleta nga kwarta kay Vice President Sara Duterte, former President Rodrigo Duterte, kag Davao City 1st District Representative Paolo Duterte sa direktiba ni Velasco.
Suno diri, masobra P2 billion ang estimate nga na-deliver ni Gracioso kay Sara Duterte.
Dugang pa diri, gin-alegar indi magnubo sa 20 ka beses nga nagdul-ong ini sang kwarta kay VP Sara.
Sa panaysayon ni Velasco, nagserbe siya bilang head sang security ni Velasco sang ini ang Congressman pa humalin sang 2018, kag tubtob sang nangin house speaker ini sang 2020 tubtob 2022.
Sa affidavit ni Gracioso, nakadetalye diri ang alleged deliveries sang mga maleta nga naga-unod P20 million tubtob P50 million sa kada lokasyon sa Metro Manila, Davao, kag iban pa nga lugar.
Ginbuyagyag sang anay pulis nga sang 2018 ang una nga bes nga nagdul-ong ini sang kwarta kay Sara Duterte.
Suno pa diri, nagturn-over siya sang kapin 10 ka mga van para gamiton sa pag-transport sang cash.
Nagpakita man si Gracioso sang mga litrato sang mga maleta kag mga kahon nga gin-alegar may unod nga P500 million cash.
Ginpahayag man sini nga kilala niya si Ramil Madriaga, nga ginapatihan bagman ni Sara Duterte.
Gin-alegar isa man si ex-Congressman Zaldy Co sa naghatag sang kwarta kay Velasco.
Samtang, wala naman nalakip sa affidavit ni Gracioso apang iya ginsaysay nga nagdul-ong man siya sang kwarta kay former President Rodrigo Duterte sa Malacañang sang 2018 kag 2022.
Gin-alegar nagduhol siya sang mga bag kay former Special Assistant to the President Bong Go sa presensya ni Rodrigo Duterte.
Ginpahayag nga nagdeliver man ang anay pulis sang maleta nga nagaunod sang P100 million kay Paolo Duterte sang pandemic.
