Napasakaan na sang kaso nga parricide ang amay nga naglabo-labo sa iya 27 anyos nga bata nga babayi sa Purok Kawayanan, Barangay Barera, Sagay City, Negros Occidental sang Miyerkules sang hapon.
Ang biktima ang ginkilala nga si Roselyn Sulan, samtang ang amay ang ginkilala nga si Richard Sulan.
Ang kaso ang napasaka pinaagi sa inquest proceedings sa adlaw mismo sang pagsungka sang suspetsado.
Bangod sini, padayun nga nakahunong sa Sagay City Police Station ang amay.
Madumduman nga sa imbestigasyon sang kapulisan, ang biktima nga may live-in partner kay may tatlo ka kabataan ang una nga nagsulong sa balay sa iya amay.
May nagluntad nga argumento sa duha tubtob nga ginhambalan sang bata nga patyon sini ang iya amay.
Wala man sang armas ang bata, apang bangod sa naka-inom sang makahulubog nga ilimnon ang amay, ini ang nagkuha sang espading kag ginlabo-labo ang iya nga bata.
Tuman man ang kalisod sang iloy kag mga kauturan sang biktima, kag halos indi makapati nga ini ang mapatay sang amay.
Aminado man ang iloy nga si Marilyn Sulan, nga masami gid man naga-away ang iya bana kag bata sini bangod indi luyag sang biktima nga gina-akigan sang iya amay ang iya mga kabataan.
Dako man ang paghinulsol sang amay, sang nahimasmasan kag narealisar ang nahimo.
Natalana nga ipalubong ang biktima sa Martes, Abril 30.
