BACOLOD CITY – Patay ang amay sang bagman sang Berya Drug Group nga si Ricky Serenio matapos ginluthang sang riding in tandem nga ginapatihan pulis sa Barangay Singcang, ciudad sang Bacolod las-9:30 kagab-i.
Ang biktima ginkilala kay Wilfredo Serenio, 53-anyos, may asawa kag lima ka mga kabataan, lakip na si Ricky.
Ginpahayag nga hungod nga gin-utod ang suplay sang kuryente sa Villa Mercedes, Barangay Singcang, rason nga napilitan ang maghimata nga Serenio nga maguwa agud magpabugnaw.
Nagaistorya ang biktima sa isa ka lalaki sang hinali ginluthang sang duha ka mga persona nga nagaangkasanay sa puti kag single nga motorsiklo.
Suno sa asawa sang biktima nga si Gina, nasugata nila ang mga suspetsado kag sang magsugod na sa pagluthang ang mga ini, napilitan siya nga idagdag sa taytay ang kaupod niya nga mga apo agud indi masalabat.
Igu sang bala sa dughan nga naglab-ot pa sa kurason sini ang ginkamatyan sang biktima.
Suno pa kay Gina, mga pulis ang nagtira sa iya nga bana apang wala niya mahibaluan ang ngalan sang mga ini apang kun iya makit-an, positibo gid niya ini matudlo ang mga ini bangud masami nagakadto ang mga ini sadtong yara pa sa Berya Drug Group si Ricky.
Sa paglaragway ni Gina, madamol ang kilay, may buy-on apang regular ang panglawason kag malaba apang nakapungos ang buhok sang gunman nga nagaangkas sa motor samtang naka-helmet naman ang driver kag suno kay Gina, naglabay pa ang mga ini sa atubangan sang Police Station 8 samtang gina-interview ini sang Bombo Radyo.
Sa madumduman nga ang manghod ni Ricky nga si Wilmar ang ginluthang man sang riding in tandem kag suno sa iloy, ang pareho man nga mga pulis nga taga-Negros Occidental Police Provincial Office (NOCPPO) ang may kahimuan sadto.
