Nagapanawagan ang amay sang ginluthang nga 20 anyos nga Grade 11 student sa Granada ville, Barangay Granada, Bacolod City, sa suspetsado nga ini ang magsungka na.
Madumduman nga ang biktima nga si Nicus Balagusa ang ginluthang patay sang suspetsado nga si Carlito “Dondon” Tongho sang Hunyo 2 sang gab-i.
Nahibaluan nga sang Mayo 30, ang biktima upod ang 16 anyos nga bata nga babayi sang suspect kag iban pa nila nga mga abyan ang may gintambungan nga birthday party.
Apang sang gab-i na nagdesisyon si Balagusa nga magpauli, samtang nabilin naman ang 16 anyos nga babayi kag iban pa, nga ginlaygayan sang biktima nga magpauli naman.
Antes paman, nagapatimaan na ang 17 kag 19 anyos nila nga abyan nga luyag tandugon ang mga babayi nila nga abyan, apang ini ang ginpaandaman man ni Balagusa nga indi himuon bangod wala sila sang padaog kun tandugon nila ang menor de edad.
Apang nahabaluan nga ginhimuslan gid sang duha ang babayi, kun sa diin ini ang nagmaoy pa kag ginguba ang ila mga motorsiklo.
Sang Mayo 31 sang aga, ginpadulungan sang 16 anyos upod sa mga abyan sini ang mga suspetsado sa pagpanglugos nga nagatambay sa bilyaran ni Balagusa, kag sang hapon ang amay naman sini ang nagpadulong kun sa diin iya ginsapote ang mga suspetsado.
Wala naman nagpasilabot si Balagusa kag ang iya mga ginikanan.
Bangod sa natabo, ginwarningan na lamang sang amay ni Balagusa ang mga suspetsado sa pagpanglugos nga indi na magtambay sa ila nga lugar.
Nahibaluan nga nakapablotter naman ang dalagita sa Bacolod Police Station 3, kag ini ang ginpakuhaan naman sang medico legal.
Apang sa pihak sini, liwat nga nagsulong ang amay sa balay ni Balagusa, kag didto na natabo ang pagpangluthang.
Sa interview sang Bombo Radyo Bacolod kay Eric Balagusa, amay sang biktima, wala ini sang kaugot ukon kaakig kay Tongho, kag luyag lamang sini nga magsungka na ang suspect kag atubangon ang krimen.
Panindugan sini nga wala man nahatagan sang hustisya ang paghimulos sa iya bata, bangod ang ginpatay sini ang inosente.
Bisan ang mga abyan ni Balagusa nga babayi ang nagapamatuod man nga ini ang wala nagatandog sang babayi, kag masami pa nga nagadul-ong sang mga babayi sini nga abyan kun mahubog.
Si Nicus Balagusa ang natalana nga dal-on sa ulihi nga palahuwayan sa Hunyo 12
