BACOLOD CITY — Gin-ako na sang New People’s Army ang pag-ambush sa mga katapo sang Guihulngan City Police Station nga ginkamatay sang anom ka mga pulis sa Brgy. Magsaysay, ciudad sang Guihulngan sang Hulyo 21.
Pinaagi sa press release, gin-ako sang NPA sa idalum sang Leonardo Panaligan Command Central Negros ang nasambit nga ambush.
Ginakalipay sang grupo ang madinalag-on nga taktikal nga opensiba batok sa Guihulngan PNP nga suno sa ila madugay na nga ginademanda sang mga pumuluyo nga mapanaugan sang silot bangud sang krimen nga ila nakomiter.
Gina-akusaran sang NPA ang Guihulngan police nga responsable sa insidente sang pagpamatay, torture, pag-uyat sang grupo sang mga kawatan, protector sang druga kag madamo pa.
Pila lamang sa ginhalimbawa sini ang iligal nga pag-aresto kag pagtorture tubtub nga napatay si Irol Vergara nga residente sang Larena St. Guihulngan City sadtong Marso tuig 2008.
Suno pa sa hubon, protector man ang Guihulngan PNP sang mga druglords kag mga pusher nga nagasupply sang shabu sa Guihulngan City halin sa Cebu City kag naga-uyat sang grupo nga kawatan nga amo ang mga responsable sa pagpang-rungkab kon gab-e sang mga groceries store sa merkado kag simbahan Katoliko sang Guihulngan.
Gin-ako man sang grupo ang pagkuha nila sang mga armas sang pulis apang ginpanindugan sini nga wala sang human rights violation bangud nga ang mga ini ang legitimate military target lakip na ang ila nga kagamitan.
