BACOLOD CITY — Personal nga makig-unong si Presidente Rodrigo Duterte sa mga nailo sang anom ka mga pulis kag isa ka sibilyan subong man magabisita ini sa mga pilason sa nagluntad nga ambush sa Barangay Magsaysay, Guihulngan City, Negros Oriental, Biyernes nagligad nga semana.
Las 2:00 karun sa hapon ginalauman nga maga-abot si Duterte sa Dumaguete City kun sa diin sugataon ini ni Presidential Assistant for the Visayas Michael Lloyd Dino, Negros Oriental Gov. Roel Degamo, mga opisyal sang kapulisan, militar, kag iban pa.
Ang bangkay sang mga gindemalas nga pulis ang dal-on sa Guihulngan City Hall kun sa diin ginalauman nga hatagan ang mga ini sang presidente sang posthumous award.
Madumduman nga napatay sa nasambit nga ambush ang hepe sang Guihulngan PNP nga si Police Supt. Arnel Arpon subong man sanday SPO2 Necasio Tabilon; SPO2 Teovic Agosto; SPO1 Jesael Ancheta; PO2 Alvin Paul Bulandres; PO2 Alfredo Dunque; kag ang driver sang motorsiklo nga si Michael Hambalos.
Samtang, pilason naman sanday SPO4 Jerome Delara; PO3 Jordan Balderas; PO2 Joery Maribao; kag Guihulngan City Councilor Paulo Edison Dela Rita.
