-- ADVERTISEMENT --

BACOLOD CITY — Wala pa nahibaluan kun san-o madayon ang pagbisita ni PNP Chief Police Director General Ronald ‘Bato’ dela Rosa sa Negros Oriental kasunod sang ambush sa mga miyembro sang Guihulngan City Police Station sang Biyernes sang aga.

Sa exclusive interview sang Bombo Radyo Bacolod, aminado si dela Rosa nga kabahin kuntani sang iya lakat ang pagbisita sa Negros Oriental ugaling indi makatiempo bangud sa kasakuon sa Metro Manila.

Sa pihak sini, ginpahayag sang PNP chief nga magabawi ang Philippine National Police matapos nga naisahan sang ginapatihan mga miyembro sang New People’s Army nga nang-ambush sa tropa sang kapulisan.

Akig si dela Rosa sa mga miyembro sang NPA bangud indi sini mabaton nga gin-finishing pa ang mga kapulisan.

Aminado ini nga ginhingalitan sang mga rebelde ang kakulang sang tropa sang gobyerno bangud ginpadala sa Marawi City ang mga suldado agud nga makig-away sa Maute terror group kag iban pa nga lokal nga terorista.

-- ADVERTISEMENT --

Kadungan sini, ginakabig sang pinuno sang PNP nga baganihan ang nagkalamatay nga mga pulis bangud bisan ano kadelikado ang lugar, ila gid nga ginkadtuan.

Paathag sini, nagaresponde gid ang mga kapulisan basta may matabo sa lugar ilabi pa nga opisyal sang gobyerno ang una nga gin-ambush sa Barangay Magsaysay.

Sa karun, naghatag na sang direktiba si dela Rosa kay Negros Oriental Police Provincial Office Director Police Senior Supt. Henry BiƱas apang indi niya ini mabuyagyag.