Gin-anunsyo ni U.S. President Donald Trump nga ipatuman sang Estados Unidos ang naval blockade sa Strait of Hormuz kasunod sang napaslawan nga peace talks sa tunga sang Iran kag pila ka mga pungsod nga ginhiwat sa Islamabad, Pakistan.
Sa isa ka post sa Truth Social, ginpahayag ni Trump nga gilayon nga maga-umpisa ang U.S. Navy sa pagbalabag sa tanan nga mga barko nga nagasulod kag nagaguwa sa oil port.
Suno diri, ang katuyuan amo ang pagpugong sa Iran sa pagkolekta sang “illegal tolls” gikan sa mga barko.
Dugang pa ni Trump, magapakigbahin man sa blockade ang iban nga mga pungsod, kag indi pagtugutan ang Iran nga makaganar sa sitwasyon samtang apektado ang pangkalibutanon nga ekonomiya.
Nagpaandam man si Trump nga magabalabag ang U.S. Navy sa tanan nga mga barko sa international waters nga gina-alegar nagabayad sang “toll” sa Iran kabaylo sa pag-labay sa Strait of Hormuz.
Apang nagpanindugan naman ang Iran Revolutionary Guards nga yara gihapon sa Iranian security forces ang kontrol sa Strait of Hormuz, kag nagpaandam sa tanan nga mga nagapamatuk sa ila nga ma-trap sa “deadly vortex” kun may yara sang miscalculation nga matabo.
