BACOLOD CITY — Ginpanginwala sang American national nga si Frank Vlasquez nga may upod siya nga armado nga mga lalaki nga nagtakas sa baybayon nga sakop sang Barangay Inayawan sa banwa sang Cauayan kag nagtuga sang kakugmat sa mga pumuluyo, Biyernes Santo sang gab-i.
Sa exclusive interview sang Bombo Radyo kay Frank nga naga-istar sa Bacong, Negros Oriental, nag-alburuto ini sang mahibaluan ang akusasyon tuhoy sa iya kag luyag niya nga maatubang ang nagpalapta sang impormasyon.
Panindugan sini, ang 11-anyos niya nga anak ang nagaisahanon niya nga kaupod nga naglayag halin sa banwa sang Santa Catalina, Negros Oriental antes nakalab-ot sa baybayon nga sakop sang Sipalay apang nagdesisyon nga magpadulong sa Cauayan.
Suno diri, isa lang ka bag ang dala nila nga kagamitan kag indi man masarangan nga ikarga sang iya bangka ang napulo ka tawo.
Gin-athag man sini nga wala siya sang koneksyon sa bisan ano nga grupo sang terorista sa Pilipinas.
