Halos indi makapati ang anak sang isa ka driver sang local government unit kag ilo na sa iloy nga nagpangatlo ini sa June 2019 Criminologist Licensure Examination.
Si Rosanie Bulacja, 21 anyos, tumandok sang Barangay Zone 4, Pulupandan, Negros Occidental ang nakakuha sang 89.95 percent nga rating kag nakakuha sang 3rd highest rating nagikan sa kabug-usan nga 7,998 nga nakapasar, santo sa resulta nga ginpagwa sang Professional Regulation Commission kahapon.
Sa interview sang Bombo Radyo Bacolod kay Bulacja, ginpahayag sini nga ilo na siya sa iloy kag driver sa munisipyo sang Pulupandan ang iya amay.
Apat ka tuig na ang nakaligad sang napatay ang iya iloy tungod sa masakit.
Apat sanday Bulacja nga mag-ulutod kag siya lang ang nakatapak sa kolehiyo.
Si Bulacja ang naggraduate nga magna cum laude sa Bago City College.
Gin-ako sini nga nagpangduha-duha ini sa pagkuha sang pasinawan bangod para sa iya, indi pa siya handa.
Apang iya sa gihapon ginpadayon ini para sa iya nga handum.
Suno diri, madamo siya sang sabat sa board exam nga gin-islan gani wala ini naglaom nga makasulod sa Top 10.
Tuman ang iya kalipay kag daw indi makapati si Bulacja sang nahibaluan sini kahapon nga number 3 siya sa Criminologist Licensure Examination.
